កាលពីព្រឹកថ្ងៃទី ២៩ ខែកញ្ញា ឆ្នាំ ២០២៥ រដ្ឋបាលខេត្តសៀមរាប បានទទួលអំណោយដ៏ថ្លៃថ្លា របស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមន៍កាយឬទ្ធិនារីកម្ពុជាអម បានផ្តល់មុងចំនួន ៦០ការ៉ុង ស្មើ ៣ពាន់មុង ទឹកស៊ីអ៉ីវ ៥០កេស និង ទឹកត្រី ៧៥យួរជូនដល់រដ្ឋបាលខេត្តសៀមរាប ដេីម្បីត្រៀមបំរុងចែកជូនដល់បងប្អូនប្រជាពលរដ្ឋ ភៀសសឹកដោយសង្គ្រាមឈានពានរបស់កងទ័ពថៃ នៅតាមមណ្ឌលភៀសសឹកក្នុងភូមិសាស្ត្រខេត្តសៀមរាប។
រដ្ឋបាលខេត្តសៀមរាប បានឲ្យដឹងថា ក្រោមការយកចិត្តទុកដាក់ខ្ពស់របស់ប្រមុខរាជរដ្ឋាភិបាល និងលោកជំទាវបណ្ឌិត ពេជ ចន្ទមុន្នី ពីទុក្ខលំបាករបស់ប្រជាពលរដ្ឋរងគ្រោះដោយសង្គ្រាម ហើយអំណោយទាំងនេះត្រូវបានអាជ្ញាធរខេត្ត ធ្វើការបែងចែកជូនដល់បងប្អូន នៅតាមមណ្ឌលសុវត្ថិភាពតាមក្រុង ស្រុក ដែលពួកគាត់កំពុងស្នាក់នៅ។ម៉្យាងទៀតដោយសភាពការណ៍នៅតាមព្រំដែន មិនធានាសុវត្ថិភាព ដោយមានការរំលោភបំពានរបស់ពួកទាហានថៃ ក្រោយការឈប់បាញ់ ធ្វេីឱ្យបងប្អូនបន្តរស់នៅក្នុងមណ្ឌល ដែលធ្វើឲ្យខាតពេលវេលារបស់បងប្អូនក្នុងការប្រកបរបរចិញ្ចឹមក្រុមគ្រួសារ ។
រដ្ឋបាលខេត្តសៀមរាប បានបន្តថា ការផ្តល់អំណោយមនុស្សធម៌ទាំងនេះ គឺមិនប្រកាន់និន្នាការនយោបាយអ្វីទាំងអស់ ក្នុងស្មារតីមហាគ្រួសារខ្មែរតែមួយ។ រាល់អំណោយដែលរដ្ឋបាលខេត្តសៀមរាប ទទួលបានពីបងប្អូន សប្បុរសជនជាតិ អន្តរជាតិ ត្រូវបានក្រុមការងារខេត្ត ធ្វើការបែងចែកផ្គត់ផ្គង់ជូនដល់បងប្អូនដែលកំពុងស្នាក់នៅតាមមណ្ឌលភៀសសឹកតាមក្រុង ស្រុក ព្រមទាំងបានផ្គត់ផ្គង់ដល់សមរភូមិមុខផងដែរ។
ជួសមុខឱ្យបងប្អូនប្រជាពលរដ្ឋ ភៀសសឹកឯកឧត្តម ប្រាក់ សោភ័ណ អភិបាល នៃគណៈអភិបាលខេត្តនិងមន្ត្រីរាជការទាំងអស់សូមគោរពថ្លែងអំណរគុណយ៉ាងជ្រាលជៅបំផុតចំពោះការយកចិត្តទុកដាក់ខ្ពស់របស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលតែងតែជួយផ្តល់ការឧបត្ថម្ភនូវសម្ភារប្រេីប្រាស់មានមុង ភួយ កន្ទេល តង់ និងគ្រឿងឧបភោគបរិភោគជាបន្តបន្ទាប់ដល់បងប្អូនប្រជាពលរដ្ឋជនភៀសសឹកដែលបានជម្លៀសមកក្នុងភូមិសាស្ត្រខេត្តសៀមរាប៕
