បន្ទាប់ពីរៀបចំអ្នកលក់ដូរគ្មានសណ្ដាប់ធ្នាប់បានល្អប្រសើរ ចាប់ពីព្រឹកថ្ងៃទី២២ ខែមករា ឆ្នាំ២០២៦នេះ រដ្ឋបាលរាជធានីភ្នំពេញ បានបើកឱ្យចរាចរណ៍ចេញចូលនៅមហាវិថីព្រះមុនីរ៉េត ជាធម្មតាសម្រាប់ពេលថ្ងៃឡើងវិញ។ ជាមួយគ្នានេះ បើតាម អ្នកនាំពាក្យរដ្ឋបាលរាជធានីភ្នំពេញ លោកស្រី ដោ សម្ផស្ស បានបញ្ជាក់ថា ទោះបីជាបើកឱ្យមានលំហូរចរាចរណ៍បែបនេះក៏ដោយ ក៏រដ្ឋបាលរាជធានីភ្នំពេញ នៅបន្តឃ្លាំមើលជាប់ជាប្រចាំ និងទប់ស្កាត់មិនឱ្យមានការឆ្លៀតឱកាសចូលលក់ដូរគ្មានសណ្ដាប់ធ្នាប់នៅលើដងផ្លូវនេះជាថ្មីទៀតនោះទេ។
ទន្ទឹមនឹងនេះ ក្នុងនាមរដ្ឋបាលរាជធានីភ្នំពេញ លោកស្រី ដោ សម្ផស្ស ក៏សំណូមពរដល់ប្រជាពលរដ្ឋទូទៅមេត្តាចូលរួមសហការ និងផ្តល់ព័ត៌មានបន្ថែមមកអាជ្ញាធរ ក្នុងករណីរកឃើញថាមានជនឆ្លៀតឱកាសមកលក់ដូរគ្មានសណ្ដាប់ធ្នាប់សារជាថ្មីនៅលើមហាវិថីព្រះមុនីរ៉េតនេះ។ ហើយអាជ្ញាធរ ក៏ថ្លែងអំណរគុណយ៉ាងជ្រាលជ្រៅបំផុតចំពោះប្រជាពលរដ្ឋទូទៅក្នុងរាជធានីភ្នំពេញដែលផ្តល់ការគាំទ្រយ៉ាងពេញទំហឹង ក្នុងការរៀបចំសណ្តាប់ធ្នាប់សាធារណៈនៅបរិវេណជុំវិញតំបន់ផ្សារដើមគនេះ។
គួរបញ្ជាក់ថា ក្រោមហេតុផលលើកកម្ពស់សោភ័ណភាពហេដ្ឋារចនាសម្ព័ន្ធ និងសណ្ដាប់ធ្នាប់របៀបរៀបរយសាធារណៈ ចាប់តាំងពីថ្ងៃទី១៨ ខែមករា ឆ្នាំ២០២៦ អាជ្ញាធររាជធានីភ្នំពេញ មិនអនុញ្ញាតឱ្យមានការលក់ដូរឥតសណ្ដាប់ធ្នាប់រំលោភចិញ្ចើមផ្លូវ និងទ្រូងផ្លូវសាធារណៈ នៅមហាវិថីមុន្នីរ៉េត មហាវិថីម៉ៅសេទុង និងតំបន់ជុំវិញផ្សារដើមគ ព្រមទាំងតំបន់ពាក់ព័ន្ធជុំវិញនោះទេ។
អាជ្ញាធរបានអំពាវនាវដល់អាជីវករ ដែលលក់ដូរគ្មានសណ្តាប់ធ្នាប់តាមដងផ្លូវ ក្នុងតំបន់ជុំវិញផ្សារដើមគរចាស់ ចូលរួមសហការបញ្ឈប់ការលក់ដូរ គ្មានសណ្តាប់ធ្នាប់លើដងផ្លូវ ដោយឲ្យប្តូរទៅលក់នៅកន្លែងថ្មីសមស្របណាមួយដែលមានតូបលក់ត្រឹមត្រូវ ឬទីតាំងដែលអាជ្ញាធរបានសហការជាមួយវិស័យឯកជនរៀបចំជូន មានដូចជា នៅផ្សារបោះដុំបន្លែផ្លែឈើ តាមបណ្តោយមហាវិថីឈ្នះៗ ក្នុងខណ្ឌព្រែកព្នៅ និងនៅផ្សារតាម៉ាប់ព្រែកជ្រៃ ក្នុងខណ្ឌដង្កោ រាជធានីភ្នំពេញ ៕
