កិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ កាលពីថ្ងៃទី០៧ ខែសីហា ឆ្នាំ២០២៥ ប្រព្រឹត្តទៅក្នុងបរិយាកាសស្ថាបនា និងវិជ្ជមាន ដែលនាំមកនូវលទ្ធផលប្រកបដោយផ្លែផ្កា ក្រោមការដឹកនាំប្រជុំរួមគ្នា ដោយឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា និងឯកឧត្តម ណាត់ថាផុង ណាកផានិច រដ្ឋមន្ត្រីស្តីទីក្រសួងការពារជាតិថៃ ។ កិច្ចប្រជុំនេះក៏មានតំណាងមកពីប្រទេសម៉ាឡេស៊ី សហរដ្ឋអាមេរិក និងប្រទេសចិន ចូលរួមសង្កេតការណ៍ផងដែរ។
នៅក្នុងកិច្ចប្រជុំGBCនេះ កម្ពុជានិងថៃ បានឯកភាពគ្នាចំនួន១៣ចំនុច លើលក្ខខណ្ឌនៃបទឈប់បាញ់ និងការរៀបចំយន្តការសម្រាប់អនុវត្ត សំដៅបន្ថយកំដៅភាពតានតឹងតាមបន្ទាត់ព្រំដែន ។ ចំនួន១៣ចំនុច នៃការអនុវត្តបទឈប់បាញ់
នោះរួមមាន៖
១. បទឈប់បាញ់រវាងភាគីទាំងសងខាង (ដោយរួមមានការប្រើប្រាស់សព្វាវុធគ្រប់ប្រភេទ និងការវាយប្រហារនានាគ្រប់រូបភាព)
២. រក្សាទីតាំងឈរជើងបច្ចុប្បន្នរបស់កងទ័ព
៣. ហាមប្រាមការបង្កើនកងទ័ពបន្ថែម
៤. ហាមប្រាមសកម្មភាពបង្កហេតុ ឬការបំពានណាមួយ
៥. ហាមប្រាមការប្រើប្រាស់កម្លាំងលេីជនស៊ីវិល ឬទ្រព្យសម្បត្តិរបស់ជនស៊ីវិល
៦. អនុវត្តតាមអនុសញ្ញាទីក្រុងហ្សឺណែវឆ្នាំ១៩៤៩ ស្តីពីការប្រព្រឹត្តលើអ្នកទោសសង្គ្រាម (ឈ្លើយសឹក)
៧. ពិគ្រោះយោបល់ និងរកដំណោះស្រាយនៅថ្នាក់មូលដ្ឋានជាមុន តាមរយៈយន្តការទ្វេភាគីដែលមានស្រាប់ (ក្នុងករណីមានជម្លោះប្រដាប់អាវុធ ទោះបីជាចេតនា ឬ អចេតនា)
វិធានការពិសេស៖
៨.
- ប្រាស្រ័យទាក់ទងរវាងកងទ័ពទាំងពីរ ជាទៀងទាត់
- រៀបចំកិច្ចប្រជុំរួមនៃគណៈកម្មាធិការព្រំដែនថ្នាក់ភូមិភាគ (RBC) ក្នុងរង្វង់ពីរសប្តាហ៍
- ប្រាស្រ័យទាក់ទងផ្ទាល់រវាងរដ្ឋមន្ត្រី និងអគ្គមេបញ្ជាការការពារជាតិ នៃភាគីទាំងពីរ (ជាទៀងទាត់)
៩. ហាមប្រាមការផ្សព្វផ្សាយព័ត៌មានមិនពិត
យន្តការនៃបទឈប់បាញ់
១០. ប្រកាន់ខ្ជាប់នូវការអនុវត្តបទឈប់បាញ់ និងបន្តបង្កេីតក្រុមអ្នកសង្កេតការណ៍អាស៊ាន (ASEAN Observer Team)
១១. រៀបចំចាត់តំណាងគណៈកម្មាធិការព្រំដែនថ្នាក់ភូមិភាគ (RBCs) ដើម្បីធានាការអនុវត្តបទឈប់បាញ់ និងសង្កេតការណ៍ដោយក្រុមអ្នកសង្កេតការណ៍អាស៊ាន (ASEAN Observer Team)
១២. ក្នុងដំណាក់កាលបឋម ភាគីទាងពីរឯកភាពឱ្យក្រុមអ្នកសង្កេតការណ៍បណ្តោះអាសន្ន (Interim Observer Team) នឹងបន្តសង្កេតការណ៍ រហូតដល់មានក្រុមអ្នកសង្កេតការណ៍ផ្លូវការ
កិច្ចប្រជុំគណៈកម្មាធិការព្រំដែនទូទៅ (GBC)
១៣. កិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) ក្នុងរង្វង់មួយខែ (ទីតាំងប្រជុំនឹងពិភាក្សាបន្ត)
គួរបញ្ជាក់ថា កិច្ចប្រជុំក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ (GBC) បានប្រព្រឹត្តទៅចពីថ្ងៃទី៤ ដល់ថ្ងៃទី៦ ខែសីហា ហើយកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) ប្រព្រឹត្តថ្ងៃទី៧ ខែសីហា ។ កិច្ចប្រជុំនេះ ធ្វើឡើងដើម្បីបន្តការតាមដាន លទ្ធផលនៃកិច្ចប្រជុំពិសេស ដែលបានប្រព្រឹត្តទៅកាលពីថ្ងៃទី២៨ ខែកក្កដា ឆ្នាំ២០២៥៕
អត្ថបទ៖ ពុទ្ធិកា
