តុលាការធម្មនុញ្ញនៃរាជាណាចក្រថៃ នាថ្ងៃសុក្រ ទី២៩ ខែសីហា សម្រេចដកហូតតំណែងនាយករដ្ឋមន្រ្តីថៃផ្លូវការ ពីលោកស្រី Paetongtarn Shinawatra ដែលជាកូនស្រីពៅរបស់លោក Thaksin Shinawatra អតីតនាយករដ្ឋមន្រ្តីដែលត្រូវយោធាធ្វើរដ្ឋប្រហារ។
ទីភ្នាក់ងារព័ត៌មាន The Nation ចេញផ្សាយឲ្យដឹងថា តុលាការធម្មនុញ្ញថៃនៅរសៀលថ្ងៃទី ២៩ ខែ សីហានេះបានសម្រេចដកតំណែងលោកស្រី Paetongtarn Shinawatra ជានាយករដ្ឋមន្រ្តី ក្រោយរកឃើញសារសម្លេងបែកធ្លាយរបស់លោកស្រីជជែកគ្នាជាមួយសម្តេចតេជោ ហ៊ុន សែន ប្រធានព្រឹទ្ធសភា ក្នុងរឿងជម្លោះព្រំដែនកាលខែមិថុនាកន្លងទៅ។
គួររំលឹកថា តុលាការធម្មនុញ្ញថៃ កាលពីថ្ងៃទី ១ កក្កដាកន្លង បានបោះឆ្នោតសម្រេចព្យួរតំណែងនាយករដ្ឋមន្រ្តីពីលោកស្រី Paetongtarn Shinawatra ជាបណ្ដោះអាសន្ន ជុំវិញរឿងអាស្រូវបែកធ្លាយកិច្ចសន្ទនា តាមទូរស័ព្ទជាមួយប្រធានព្រឹទ្ធសភាកម្ពុជា។
លោកស្រី Paetongtarn បានក្លាយជានាយករដ្ឋមន្ត្រីទី៥ ក្នុងរយៈពេល ១៧ ឆ្នាំដែលត្រូវបានដកពីតំណែងដោយតុលាការធម្មនុញ្ញថៃ៕
