រោងចក្រផលិតសំលៀកបំពាក់របស់ក្រុមហ៊ុនខេមបូឌា ហ័រជយ ថេកស្តាយ ឯ.ក ដែលមានទំហំទុនវិនិយោគប្រមាណ ៣០លានដុល្លារ បានបើកការដ្ឋានសាងសង់នាព្រឹកថ្ងៃទី៣០ ខែសីហា ឆ្នាំ២០២៥នេះ នៅក្នុងតំបន់សេដ្ឋកិច្ចពិសេសឈីលូ ក្រុងស្វាយរៀង ខេត្តស្វាយរៀង។
ក្នុងពិធីបើកការដ្ឋាន ឯកឧត្តម ប៉េង ពោធិ៍សា អភិបាលខេត្តស្វាយរៀង បានបង្ហាញមោទនភាពសម្រាប់ខេត្ត និងសម្រាប់ប្រទេសកម្ពុជាទាំងមូល ហើយបានបញ្ជាក់ថា នេះជានិមិត្តរូបនៃទំនុកចិត្ត កិច្ចសហប្រតិបត្តិការ និងវិបុលភាពរួមគ្នារវាងប្រទេសកម្ពុជា និងដៃគូវិនិយោគរបស់កម្ពុជា។
ឯកឧត្តម បន្តថា ការបង្កើតរោងចក្រនេះ នឹងផ្តល់នូវអត្ថប្រយោជន៍ដល់សេដ្ឋកិច្ចយ៉ាងសំខាន់ នឹងបង្កើតឱកាសការងារសម្រាប់កម្មករ កម្មការនី ប្រមាណជាង២០០០នាក់ និងការពង្រឹងពង្រីកមូលដ្ឋានឧស្សាហកម្មក្នុងតំបន់ និងរួមចំណែកដល់គោលដៅអភិវឌ្ឍន៍ជាតិ ហើយការវិនិយោគនេះ ស្របទៅតាមយុទ្ធសាស្ត្ររបស់រាជរដ្ឋាភិបាលកម្ពុជា ក្នុងការលើកកម្ពស់កំណើនឧស្សាហកម្មទាក់ទាញការវិនិយោគផ្ទាល់ពីបរទេសប្រកបដោយការទទួលខុសត្រូវ និងលើកកម្ពស់តួនាទី របស់កម្ពុជានៅក្នុងខ្សែសង្វាក់ផ្គត់ផ្គង់ទៅដល់ប្រទេសនានាលើពិភពលោក។
ក្នុងនាមជាអភិបាលខេត្ត ឯកឧត្តម បានគាំទ្រយ៉ាងពេញទំហឹង និងសង្ឃឹមជឿជាក់ថាគម្រោងនេះនិងដំណើរការទៅមុខដោយរលូន និងមានប្រសិទ្ធភាព។ រដ្ឋបាលខេត្តបានត្រៀមខ្លួនរួចជាស្រេចដើម្បីជួយសម្របសម្រួលគ្រប់មធ្យោបាយដែលអាចធ្វើទៅបាន នៅពេលក្រុមហ៊ុនជួបបញ្ហា ទាំងក្នុងពេលសាងសង់ និងនៅពេលអនាគតនៅពេលប្រតិបត្តិការចាប់ផ្តើមជាដើម៕
អត្ថបទ៖ ពុទ្ធិកា
