នាយករដ្ឋមន្ត្រី អាន់វ៉ា អ៊ីប្រាហ៊ីម បាននិយាយនៅថ្ងៃអង្គារនេះថា តួនាទីរបស់ម៉ាឡេស៊ីក្នុងការចរចាសន្តិភាពរវាងថៃ និងកម្ពុជា ត្រូវបានកំណត់ចំពោះការសម្របសម្រួល និងការសម្របសម្រួល ដោយមិនមានលក្ខខណ្ឌណាមួយ។
លោកថា ម៉ាឡេស៊ីមិនដែលបង្ខំភាគីណាមួយក្នុងអំឡុងពេលដំណើរការសន្តិភាពនោះទេ ប៉ុន្តែគ្រាន់តែដើរតួជាអ្នកសម្របសម្រួលដើម្បីធានាការសន្ទនាក្នុងន័យស្ថាបនា។ នេះបើតាមសារព័ត៌មាន freemalaysiatoday ចេញផ្សាយនៅថ្ងៃទី១១ ខែវិច្ឆិកា។
លោក អាន់វ៉ា បានថ្លែងថា៖ “យើងគ្រាន់តែសម្របសម្រួល។ ខ្ញុំនៅតែចាំថានៅពេលដែលខ្ញុំនាំនាយករដ្ឋមន្រ្តីទាំងពីរ (ថៃ-កម្ពុជា) មកជាមួយគ្នា ខ្ញុំបានប្រាប់ពួកគេថា អ្នកសម្រេចចិត្តលក្ខខណ្ឌ ខ្ញុំនៅទីនេះដើម្បីជួយសម្របសម្រួល និងលើកកម្ពស់សន្តិភាព”។ នេះគឺជាការអះអាងរបស់ លោក អាន់វ៉ា ក្នុងការឆ្លើយតបទៅនឹងសំណួរពីតំណាងរាស្ត្រម៉ាឡេស៊ី ក្នុងអំឡុងពេលឆ្លើយសំណួរនាថ្ងៃអង្គារ ទី១១ ខែវិច្ឆិកានេះ ដើម្បីឆ្លើយតបទៅនឹងការចោទប្រកាន់ ដែលធ្វើឡើងដោយឧត្ដមសេនីយ៍ថៃចូលនិវត្តន៍ម្នាក់ ទាក់ទងនឹងកិច្ចព្រមព្រៀងសន្តិភាពថៃ-កម្ពុជា ដោយលើកឡើងចោទប្រកាន់លោក អាន់វ៉ា ថាជាជនក្បត់ ដែលបានបង្កការខាតបង់ផ្នែកសេដ្ឋកិច្ចដល់ប្រទេសថៃ តាមរយៈកិច្ចព្រមព្រៀងសន្តិភាព។ ឧត្ដមសេនីយ៍ថៃចូលនិវត្តន៍ម្នាក់នោះអះអាងថា កិច្ចព្រមព្រៀងនោះបានអនុញ្ញាតឱ្យសហរដ្ឋអាមេរិកជ្រៀតជ្រែកក្នុងតំបន់ ជាពិសេសនៅក្នុងប្រទេសថៃ។
លោកនាយករដ្ឋម៉ាឡេស៊ី បាននិយាយថា លក្ខខណ្ឌនៃការចរចាសន្តិភាពត្រូវបានកំណត់ទាំងស្រុងដោយប្រទេសថៃ និងកម្ពុជា។ លោកថ្លែងថា៖ “ពួកគេបានកំណត់លក្ខខណ្ឌមិនមែនយើងទេ។ យើងមិនបានដាក់លក្ខខណ្ឌណាមួយសម្រាប់សន្តិភាពទេ។ ប្រទេសទាំងពីរបានឈានដល់កិច្ចព្រមព្រៀងរបស់ពួកគេ”។
លោក អាន់វ៉ា បានបន្ថែមទៀតថា ទោះបីជាមានការរិះគន់ពីមតិមួយចំនួនក៏ដោយ ទាំងប្រទេសថៃ និងកម្ពុជា នៅតែមានទំនុកចិត្តលើតួនាទីអព្យាក្រឹតរបស់ម៉ាឡេស៊ីក្នុងការលើកកម្ពស់សន្តិភាពក្នុងតំបន់។
ជាមួយគ្នានេះ លោកក៏បានគូសបញ្ជាក់ផងដែរថា ភាពតានតឹងនាពេលបច្ចុប្បន្ននេះកើតចេញពីការផ្ទុះគ្រាប់មីននៅក្នុងតំបន់ព្រំដែនមួយកន្លែង ហើយត្រូវបានចោទប្រកាន់ថា កងកម្លាំងកម្ពុជាជាអ្នកគ្រាប់មីនដាក់ថ្មី ដែលនាំឱ្យប្រទេសថៃពន្យារពេលអនុវត្តកិច្ចព្រមព្រៀងសន្តិភាព។ លោកថា លោកកំពុងរង់ចាំការបញ្ជាក់ ប៉ុន្តែដោយមិនធ្វើឱ្យប៉ះពាល់ដល់ដំណើរការសន្តិភាពនោះទេ។
សូមជម្រាបជូនថា កម្ពុជា និងថៃ បានចុះហត្ថលេខាលើកិច្ចព្រមព្រៀងសន្តិភាពនៅទីក្រុងកូឡាឡាំពួរកាលពីថ្ងៃទី ២៦ ខែតុលា ដែលធ្វើជាសាក្សីដោយប្រធានាធិបតីសហរដ្ឋអាមេរិក ដូណាល់ ត្រាំ និងលោក អាន់វ៉ា អីប្រាហ៊ីម បន្ទាប់ពីភាគីទាំងពីរបានយល់ព្រមលើបទឈប់បាញ់ដោយគ្មានលក្ខខណ្ឌមួយនៅថ្ងៃទី២៨ ខែកក្កដា បន្ទាប់ពីភាពតានតឹងនៅតាមព្រំដែនជាច្រើនសប្តាហ៍៕
