នាវាដឹកទំនិញដំបូងបានចេញដំណើរពីកំពង់ផែ Suzhou ប្រទេសចិន កាលពីថ្ងៃទី១៦ ខែមិថុនា ឆ្នាំ២០២៥ ឆ្ពោះមកកាន់កំពង់ផែក្រុងព្រះសីហនុ ប្រទេសកម្ពុជា ដែលជាសញ្ញាបង្ហាញពីការបើកដំណើរការជាផ្លូវការនៃជើងនាវាកុងតឺន័រថ្មីមួយ ដោយជោគជ័យ។
ឯកឧត្តម Wang Wenbin ឯកអគ្គរដ្ឋទូតចិនប្រចាំកម្ពុជាបានឱ្យដឹងថា «កំពង់ផែចិន Taicang គឺជាកន្លែងចាប់ផ្ដើមសម្រាប់ការចេញដំណើររបស់លោកមន្រ្តីចិន Zheng He ទៅកាន់ភាគខាងលិចនៃមហាសមុទ្រក្នុងអំឡុងរាជវង្ស Ming»។
ឯកឧត្តម វ៉ាង វិនពិន បញ្ជាក់ថា ការបើកជើងនាវាឆ្ពោះទៅត្រង់នេះ អាចកាត់បន្ថយពេលវេលាដឹកជញ្ជូនពីចន្លោះ ១៥ ទៅ ២០ ថ្ងៃ មកត្រឹមតែ ៩ ថ្ងៃប៉ុណ្ណោះ បើប្រៀបធៀបនឹងប្រព័ន្ធដឹកជញ្ជូនប្រពៃណី។
តាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងឆ្នាំ ២០២៤ សកម្មភាពនៃការនាំចូល នាំចេញទំនិញរវាងប្រទេសកម្ពុជា និងចិន មានទឹកប្រាក់សរុបជាង ១៥ពាន់លានដុល្លារ កើនឡើងជាង ២៣ភាគរយបើធៀបនឹងឆ្នាំ ២០២៣ ដែលមានចំនួន ជាង១២ ពាន់លានដុល្លារ។
ក្នុងចំនួននេះ គឺទំនិញចិននាំមកកម្ពុជា មានចំនួនជាង ១៣ពាន់លានដុល្លារ កើនឡើង ២៤,៦ ភាគរយ ចំណែកទំនិញកម្ពុជានាំទៅប្រទេសចិនជាង១ពាន់លានដុល្លារ កើនជាង១៨ ភាគរយ។
ជាមួយគ្នានេះ ការដឹកជញ្ជូននេះក៏ត្រូវបានគេរំពឹងថានឹងជួយអោយការផ្គត់ផ្គង់ទំនិញរវាងចិន និងកម្ពុជាមានភាពរលូន និងប្រសើរជាងមុនក្នុងរយៈពេលខាងមុខផងដែរ៕
អត្ថបទ៖ ផុន លីហ្សា
