សភាពាណិជ្ជកម្មបារាំង-កម្ពុជា សហការជាមួយរដ្ឋបាលខេត្តសៀមរាប នឹងរៀបចំកម្មវិធី «អបអរសាទរទិវាហ្វ្រង់កូហ្វូនី ២០២៥» ដើម្បីលើកកម្ពស់វិស័យពាណិជ្ជកម្ម សេដ្ឋកិច្ច វប្បធម៌ ទេសចរណ៍ និងដើម្បីជួយផ្សព្វផ្សាយប្រជាប្រិយភាពជាសកលរបស់ប្រទេសកម្ពុជា ក៏ដូចជាខេត្តសៀមរាប។ កម្មវិធីនេះ នឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៥ វេលាម៉ោង៩ព្រឹក ដល់ម៉ោង១០យប់។
តាមសេចក្តីជូនដំណឹងរបស់រដ្ឋបាលខេត្តសៀមរាប កាលពីថ្ងៃទី១១ ខែវិច្ឆិកា ឆ្នាំ២០២៥ កម្មវិធី «អបអរសាទរទិវាហ្វ្រង់កូហ្វូនី ២០២៥» នឹងមាន សកម្មភាពដូចជា ផ្សារវប្បធម៌ដែលមានស្តង់ប្រមាណ ៥០ស្តង់ ដាក់តាំងបង្ហាញផលិតផល និងសិប្បកម្មមកពីប្រទេសបារាំង និងផលិតផលសិប្បកម្មក្នុងស្រុករបស់ប្រទេសកម្ពុជា និងការប្រគំតន្ត្រីនៅយប់ថ្ងៃសៅរ៍ ទី១៥ ខែវិច្ឆិកា ឆ្នាំ២០២៥។
ក្នុងន័យនេះ ដើម្បីបញ្ចៀសការកកស្ទះចរាចរ និងធានាបាននូវសន្តិសុខ សណ្តាប់ធ្នាប់ និងរបៀបរៀបរយ ឱ្យបានល្អប្រសើរនៅក្នុងការរៀបចំកម្មវិធី រដ្ឋបាលខេត្តសៀមរាបនឹងផ្អាកការធ្វើចរាចរជាបណ្តោះអាសន្ន លើកំណាត់ផ្លូវតាមបណ្តោយមាត់ស្ទឹងលើវិថីពោធិ៍កំបោរ ត្រង់ចំណុចចាប់ពីសណ្ឋាគារFCC ដល់ស្ពានវត្តរាជបូព៌ ចាប់ពីថ្ងៃទី១៤ ខែវិច្ឆិកា ឆ្នាំ២០២៥ រហូតដល់ចប់កម្មវិធី។
រដ្ឋបាលខេត្តសៀមរាប ក៏សូមក្តីយោគយល់អធ្យាស្រ័យពីប្រជាពលរដ្ឋ ម្ចាស់អាជីវកម្មដ្ឋានគ្រប់ប្រភេទដែលនៅទីតាំងរៀបចំកម្មវិធី ភ្ញៀវទេសចរជាតិ-អន្តរជាតិ និងសាធារណជន ព្រមទាំងចូលរួមសហការជាមួយអាជ្ញាធរមានសមត្ថកិច្ចពាក់ព័ន្ធតាមការគួរ។
