រដ្ឋមន្ត្រីការបរទេសអាមេរិក លោក Marco Rubio បានជួបជាមួយគណៈប្រតិភូអ៊ុយក្រែន ដែលដឹកនាំដោយប្រធានអ្នកចរចាថ្មីនៅរដ្ឋផ្លរីដា សម្រាប់កិច្ចពិភាក្សាដែលលោកបាននិយាយថា មានបំណងបង្កើតផ្លូវសម្រាប់អ៊ុយក្រែន ដើម្បីរក្សាអធិបតេយ្យភាព និងឯករាជ្យ ខណៈដែលមុនការចរចាថ្មីមកដល់ ក្រុមមន្រ្តីរបស់ប្រធានាធិបតី Donald Trump បានដាក់សម្ពាធដល់អ៊ុយក្រែនឲ្យធ្វើសម្បទានសំខាន់ៗដោយខ្លួនឯង រួមទាំងការប្រគល់ទឹកដីទៅឲ្យរុស្ស៊ី។
យោងតាមសារព័ត៌មាន CNA បានឲ្យដឹងថា មន្ត្រីសហរដ្ឋអាមេរិក និងអ៊ុយក្រែន បានរៀបចំនូវអ្វីដែលភាគីទាំងពីរហៅថា កិច្ចចរចាប្រកបដោយផលិតភាព កាលពីថ្ងៃអាទិត្យ ទី៣០ ខែវិច្ឆិកា អំពីកិច្ចព្រមព្រៀងសន្តិភាពរុស្ស៊ី ដោយរដ្ឋមន្ត្រីការបរទេស លោក Marco Rubio បានសម្តែងសុទិដ្ឋិនិយមអំពីវឌ្ឍនភាពឈានទៅបញ្ចប់សង្រ្គាមរុស្សុីអ៊ុយក្រែន ទោះបីជាមានបញ្ហាប្រឈមក្នុងការបញ្ចប់ដែលអូសបន្លាយជាង ៣ឆ្នាំយ៉ាងណាក្តី។
លោក Rubio ប្រាប់អ្នកយកព័ត៌មានបន្ទាប់ពីកិច្ចពិភាក្សាបានបញ្ចប់ថា “យើងបន្តមានភាពប្រាកដនិយមថាតើវាលំបាកប៉ុណ្ណា ប៉ុន្តែមានសុទិដ្ឋិនិយម ជាពិសេសនៅពេលដែលយើងរីកចម្រើន។ ខ្ញុំគិតថាមានចក្ខុវិស័យរួមគ្នានៅទីនេះ ដែលមិនមែនគ្រាន់តែជាការបញ្ចប់សង្រ្គាមនោះទេ។ វាជាការធានាអនាគតរបស់អ៊ុយក្រែន ដែលជាអនាគតមួយដែលយើងសង្ឃឹមថានឹងមានភាពរុងរឿងជាងអ្វីដែលធ្លាប់មាន”។
បេសកជនពិសេស លោក Steve Witkoff និងកូនប្រសាររបស់ប្រធានាធិបតីអាមេរិក Donald Trump គឺលោក Jared Kushner ក៏មានវត្តមានតំណាងភាគីអាមេរិកផងដែរ។ លោក Witkoff ចាកចេញនៅថ្ងៃច័ន្ទនេះទៅកាន់ទីក្រុងម៉ូស្គូ ជាកន្លែងដែលលោកត្រូវបានគេរំពឹងថានឹងជួបជាមួយសមភាគីរុស្ស៊ីសម្រាប់កិច្ចពិភាក្សាក្នុងសប្តាហ៍នេះ។
លោក Rubio បាននិយាយថា “មានការងារច្រើនទៀតដែលត្រូវធ្វើ។ មានផ្នែកផ្លាស់ប្តូរជាច្រើន ហើយជាក់ស្តែងមានភាគីមួយផ្សេងទៀតដែលពាក់ព័ន្ធនៅទីនេះ… ដែលនឹងត្រូវតែជាផ្នែកមួយនៃគន្លឹះ ហើយវានឹងបន្តនៅចុងសប្តាហ៍នេះ នៅពេលដែលលោក Witkoff ធ្វើដំណើរទៅកាន់ទីក្រុងម៉ូស្គូ”។
សូមជម្រាបថា កិច្ចពិភាក្សាបានផ្លាស់ប្តូរកាលពីថ្ងៃអាទិត្យជាមួយនឹងការផ្លាស់ប្តូរការដឹកនាំពីភាគីអ៊ុយក្រែន។ ប្រធានអ្នកចរចាថ្មី លេខាធិការក្រុមប្រឹក្សាសន្តិសុខជាតិ លោក Rustem Umerov បានដឹកនាំការពិភាក្សាសម្រាប់ទីក្រុង Kyiv បន្ទាប់ពីការលាលែងពីតំណែងកាលពីថ្ងៃសុក្ររបស់ប្រធានក្រុមមុន លោក Andriy Yermak ដែលជាប្រធានបុគ្គលិករបស់ប្រធានាធិបតីអ៊ុយក្រែនលោក Volodymyr Zelenskyy ចំពេលមានរឿងអាស្រូវពុករលួយនៅក្នុងផ្ទះ។
លោក Trump បានប្រាប់អ្នកយកព័ត៌មាននៅលើយន្តហោះ Air Force One កាលពីថ្ងៃអាទិត្យដោយសំដៅទៅលើរឿងអាស្រូវពុករលួយដែលលោកបាននិយាយថា “អ៊ុយក្រែនមានបញ្ហាតិចតួចមួយចំនួន” ។ លោកបាននិយាយឡើងវិញនូវទស្សនៈរបស់លោកថា ទាំងរុស្ស៊ី និងអ៊ុយក្រែនចង់បញ្ចប់សង្រ្គាម ហើយបាននិយាយថា មានឱកាសល្អដែលកិច្ចព្រមព្រៀងអាចត្រូវបានសម្រេច៕
