នៅចំពោះមុខប្រធានាធិបតី ដូណាល់ ត្រាំ ប្រធានាធិបតី ស៊ី ជីនពីង បានគូសបញ្ជាក់ថា ប្រទេសចិន និងសហរដ្ឋអាមេរិកអាចរួមដៃគ្នាទទួលខុសត្រូវក្នុងនាមជាប្រទេសធំៗ ហើយធ្វើការរួមគ្នាដើម្បីសម្រេចបាននូវអ្វីដែលអស្ចារ្យ ជាក់ស្តែង និងល្អជាងនេះ។ នេះបើតាមអ្នកនាំពាក្យក្រសួងការបរទេសចិន លោកស្រី Mao Ning បានឲ្យដឹងលើបណ្តាញសង្គមនៅថ្ងៃទី៣០ ខែតុលា ក្រោយជំនួបមេដឹកនាំទាំងពីរ។
សម្តីនិយាយដោយសង្កត់ធ្ងន់របស់លោក ស៊ី គឺចង់សំដៅដល់តួនាទីដ៏សំខាន់របស់ចិន និងអាមេរិកក្នុងការធានាដោះស្រាយបញ្ហាក្នុងតំបន់ ពិសេស ការចរចារសន្តិភាពដើម្បីបញ្ចប់សង្រ្គាមដែលកំពុងកើតមាន។
ជំនួបក្នុងប្រទេសកូរ៉េខាងត្បូងជាលើកដំបូង ក្រោយខកខានអស់ពេល ៦ឆ្នាំ ទីដែលមេដឹកនាំទាំងពីរចូលរួមកិច្ចប្រជុំកំពូលពាណិជ្ជកម្ម នៅថ្ងៃទី៣០ ខែតុលានេះ លោក ស៊ី បានកត់សម្គាល់ថា ប្រធានាធិបតី ត្រាំ មានការសាទរយ៉ាងខ្លាំងក្នុងការដោះស្រាយបញ្ហាសំខាន់ៗក្នុងតំបន់។ ចិនក៏បាននិងកំពុងជំរុញការចរចាសន្តិភាពដើម្បីដោះស្រាយបញ្ហាចំណុចក្តៅផ្សេងៗ។
លោកបាននិយាយថា ពិភពលោកសព្វថ្ងៃនេះកំពុងប្រឈមមុខនឹងបញ្ហាដ៏លំបាកជាច្រើន។ ប្រទេសចិន និងសហរដ្ឋអាមេរិកអាចរួមគ្នាទទួលខុសត្រូវរបស់យើងក្នុងនាមជាប្រទេសធំៗ ហើយធ្វើការរួមគ្នាដើម្បីសម្រេចបាននូវអ្វីដែលអស្ចារ្យ និងជាក់ស្តែងបន្ថែមទៀតសម្រាប់ជាប្រយោជន៍នៃប្រទេសទាំងពីររបស់យើង និងពិភពលោកទាំងមូល៕
