ឯកឧត្តម ស សុខា រដ្ឋមន្ត្រីក្រសួងមហាផ្ទៃ បានសរសេរលើបណ្ដាញសង្គមហ្វេសប៊ុកនាថ្ងៃទី២៥ ខែកក្កដានេះថា៖ «ក្នុងស្ថានភាពដែលកម្លាំងកងយោធពលខេមរភូមិន្ទ និងកម្លាំងនគរបាលការពារព្រំដែន កំពុងអនុវត្តបទបញ្ជាដ៏ម៉ឺងម៉ាត់ សម្ដេចមហាបវរធិបតីនាយករដ្ឋមន្ត្រី និងមានសម្ដេចអគ្គមហាសេនាបតីតេជោ ហ៊ុន សែន ជាអគ្គមគ្គុទេសន៍នយោបាយនៃកម្ពុជា បានកំពុងដឹកនាំបញ្ជាប្រយុទ្ធការពារបូរណភាពទឹកដី និងអធិបតេយ្យភាពជាតិពីការឈ្លានពានរបស់បច្ចាមិត្តយ៉ាងអង់អាច។
ឯកឧត្តម ស សុខា បានអំពាវនូវជាថ្មីម្ដងទៀតដល់ ឯកឧត្តម លោកជំទាវ លោក លោកស្រី ជាថ្នាក់ដឹកនាំរដ្ឋបាលរាជធានី-ខេត្ត ទាំងជាប់ព្រំដែន និងពាក់ព័ន្ធ បន្តយកចិត្តទុកដាក់ខ្ពស់ និងជាអាទិភាពបំផុតលើស្មារតីប្រកៀកស្មាគាំទ្រកម្លាំងកងយុទ្ធពលខេមរភូមិន្ទ និងនគរបាលការពារព្រំដែន ធានាគាំពារសុវត្ថិភាព ផ្គត់ផ្គង់ស្បៀងអាហារ ថ្នាំសង្កូវ ជម្រក ព្រមទាំងសេវាបម្រើជីវភាពប្រចាំថ្ងៃនានាជូនប្រជាពលរដ្ឋដែលភៀសខ្លួនពីតំបន់ចាប់ផ្ដើមវាយប្រហារដោយភាគីថៃមុនមកលើកម្ពុជាឱ្យបានសមស្រប និងភាពកក់ក្ដៅ។
ទន្ទឹមនេះ ឯកឧត្តមបានបន្តយកចិត្តទុកដាក់សម្របសម្រួលគាំទ្រជូនប្រជាពលរដ្ឋ ដែលចាកចេញពីប្រទេសថៃមកវិញឱ្យបានទៅស្រុកកំណើតប្រកបដោយសុវត្ថិភាព និងធានាឱ្យបានជាប្រក្រតីនូវសេវាសាធារណៈទាំងសេវាចាំបាច់ និងសេវាតម្រូវការនានា។
ឯកឧត្តមរៀបរាប់បន្តថា អាជ្ញាធររដ្ឋបាលដែនដី និងកងកម្លាំងគ្រប់មូលដ្ឋានក្របខណ្ឌក្រសួងមហាផ្ទៃ និយាយដោយឡែក និងជាទូទៅ សូមចូលរួមផ្សព្វផ្សាយដល់ប្រជាពលរដ្ឋតាមគ្រប់មធ្យោបាយ ឱ្យបានដឹង និងជ្រាបនូវព័ត៌មានពិត ដែលចេញផ្សាយ ឬបញ្ជាក់ដោយរាជរដ្ឋាភិបាល ឬពីនាក់នាំពាក្យ តំណាងក្រសួង ស្ថាប័ន និងអង្គភាពសាធារណៈ ហើយចៀសវាងការផ្សព្វផ្សាយ ឬចូលរួមចែករំលែកព័ត៌មានមិនពិត ព័ត៌មានដែលធ្វើឱ្យប៉ះពាល់ដល់ការសម្ងាត់ជាតិ កិច្ចការកងទ័ព និងកិច្ចការនគរបាលការពារព្រំដែនជាដើម។
លើសពីនេះ ឯកឧត្តមរដ្ឋមន្ត្រីក្រសួងមហាផ្ទៃ សូមមន្ត្រីនគរបាល និងមន្ត្រីរដ្ឋបាលដែនដីគ្រប់ថ្នាក់ ដែលបាននិងកំពុងបំពេញភារកិច្ចតាមគោលដៅជាយុទ្ធសាស្ត្រ ជាអាទិ៍ សមរភូមិវាយប្រយុទ្ធ ទីតាំងឈរជើងរបស់កងកម្លាំង ឬព័ត៌មានផ្សេងៗពាក់ព័ន្ធនឹងសកម្មភាពកងកម្លាំងនៅតំបន់ជួរមុខ ត្រូវប្រកាន់ខ្ជាប់ជាដាច់ខាត រក្សាការសម្ងាត់ ដោយមិនត្រូវបង្ហោះរូបភាព វីដេអូ ឬសារសំឡេងណាមួយដែលគ្មានគោលការណ៍អនុញ្ញាតពីថ្នាក់ដឹកនាំ ឬចែករំលែក រូបភាព ខ្លឹមសារសំណេរ វីដេអូ ដែលគ្មានប្រភពច្បាស់លាស់ ឬដែលមានកម្មវត្ថុបង្កឱ្យមានការភាន់ច្រឡំ ប៉ះពាល់ដល់ផលប្រយោជន៍ជាតិ។
ឯកឧត្តម ស សុខា បួងសួងគុណបុណ្យព្រះបារមីនៃវត្ថុស័ក្ដិសិទ្ធទាំងឡាយក្នុងលោក ដួងព្រះវិញ្ញាណក្ខន្ធព្រះមហាក្សត្រខ្មែរគ្រប់ជំនាន់ ដួងវិញ្ញាណក្ខន្ធបុព្វបុរស វីរជន មេទ័ពខ្មែរគ្រប់ជំនាន់ តាមឃុំគ្រងអភិបាលរក្សាកម្លាំងកងយោធពលខេមរភូមិន្ទ កម្លាំងនគរបាលការពារព្រំដែន និងប្រជាពលរដ្ឋតាមព្រំដែន បានប្រកបដោយសុវត្ថិភាព និងទទួលបានជោគជ័យគ្រប់សមរភូមិប្រយុទ្ធ។
ក្រៅពីនេះ ឯកឧត្តមក៏សូមជូនពរ និងផ្ដល់ការលើកទឹកចិត្តខ្ពស់បំផុត ចំពោះ ឯកឧត្តម លោកជំទាវ លោក លោកស្រី ជាអភិបាល រាជធានីខេត្ត ជាពិសេសខេត្តជាប់ព្រំដែនកម្ពុជា-ថៃ ស្នងការនៃស្នងការដ្ឋាននគរបាល មេបញ្ជាការនគរបាលការពារព្រំដែនគោក អធិការដ្ឋាននគរបាល ប៉ុស្តិ៍នគរបាលរដ្ឋបាល នគរបាលអន្តោប្រវេសន៍តាមបណ្ដាច្រកទ្វារព្រំដែន ព្រមទាំងបងប្អូនប្រជាពលរដ្ឋ ជាពិសេសពលរដ្ឋរស់នៅតាមបណ្ដាខេត្តជាប់ព្រំដែន សូមបានប្រកបដោយសេចក្ដីសុខ សុវត្ថិភាព និងទទួលបានជោគជ័យគ្រប់បេសកកម្ម និងភារកិច្ចបម្រើបុព្វហេតុជាតិ និងប្រជាជន ក្រោមដំបូលរាជរដ្ឋាភិបាលដ៏ជោគជ័យ៕
