ស្ថិតក្នុងបរិបទនៃបញ្ហាប្រឈមនិងភាពមិនប្រាកដ ប្រជាជាសកល សម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភា បានបង្ហាញជំនឿជឿជាក់ថា ប្រទេសកម្ពុជា និងម៉ាឡេស៊ី នឹងរីកចម្រើនជាមួយគ្នាតាមរយៈកិច្ចប្រឹងប្រែងរួម និងកិច្ចសហប្រតិបត្តិការទ្វេភាគី និងពហុភាគីយ៉ាងជិតស្និទ្ធ ។
ក្នុងលិខិតជូនពរដែលផ្ញើទៅកាន់ ឯកឧត្តម ដាតុ អាវ៉ាង បៀមី ប៊ីន អាវ៉ាង អាលី បាសា ប្រធានព្រឹទ្ធសភាម៉ាឡេស៊ី ក្នុងឱកាសខួបលើកទី៦៨ ទិវាបុណ្យជាតិម៉ាឡេស៊ី កាលពីថ្ងៃទី២៨ ខែសីហា ឆ្នាំ២០២៥ សម្តេចតេជោ ហ៊ុន សែន បានគូសបញ្ជាក់ថា ចាប់តាំងពីការបង្កើតនៅឆ្នាំ១៩៥៧ ទំនាក់ទំនងការទូតជាមិត្តរបស់ប្រជាជាតិទាំងពីរបាន រីកចម្រើនយ៉ាងខ្លាំងតាមរយៈកិច្ចសហប្រតិបត្តិការជិតស្និទ្ធលើវិស័យជាច្រើន រួមទាំងនយោបាយ ការអភិវឌ្ឍ សង្គម-សេដ្ឋកិច្ច និងការផ្លាស់ប្តូរប្រជាជន និងប្រជាជន។
សម្តេចតេជោ ហ៊ុន សែន បានកោតសរសើរ ម៉ាឡេស៊ីចំពោះវឌ្ឍនភាពសេដ្ឋកិច្ច និងសង្គមដ៏អស្ចារ្យដែលប្រជាជន និង រដ្ឋាភិបាលម៉ាឡេស៊ី សម្រេចបាននិងតួនាទីយ៉ាងសំខាន់របស់ខ្លួននៅលើឆាកតំបន់ និងអន្តរជាតិ។ សម្តេចក៏បានអបអរសាទរផងដែរ ចំពោះម៉ាឡេស៊ីក្នុងនាមជាប្រធានអាស៊ានបច្ចុប្បន្ន ដែលបាននិងកំពុងដឹកនាំការងារ អាស៊ានប្រកបដោយប្រសិទ្ធភាព ដើម្បីផលប្រយោជន៍រួមនៃសហគមន៍អាស៊ាន និងពិភពលោក។
ផ្អែកលើសេចក្តីប្រាថ្នាចង់បានសន្តិភាព និងកិច្ចសហប្រតិបត្តិការតំបន់និងសកល សម្តេចតេជោ ទន្ទឹងរង់ចាំ ធ្វើការយ៉ាងជិតស្និទ្ធជាមួយ ឯកឧត្តម នៅក្នុងការពង្រឹងកិច្ចសហប្រតិបត្តិការរវាងស្ថាប័ននីតិប្បញ្ញត្តិយើង ទាំងពីរ ដែលនឹងរួមចំណែកជំរុញ និងធ្វើឱ្យកាន់តែស៊ីជម្រៅថែមទៀតនូវកិច្ចទំនាក់ទំនងយូរអង្វែងរវាង ប្រទេសទាំងពីរ។
ទន្ទឹមនឹងនេះ ក្នុងនាមប្រជាជន ព្រមទាំងស្ថាប័ននីតិប្បញ្ញត្តិ និងនីតិប្រតិបត្តិ ជាពិសេសព្រឹទ្ធសភានៃកម្ពុជា សម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភា ក៏បានអបអរសាទរស្មោះអស់ពីចិត្ត និងជូនពរ ឯកឧត្តម ដាតុ អាវ៉ាង បៀមី ប៊ីន អាវ៉ាង អាលី បាសា ប្រធានព្រឹទ្ធសភាម៉ាឡេស៊ី និងប្រជាជនម៉ាឡេស៊ី ក្នុងឱកាសដ៏មាននក្ខត្តឫក្សខួបលើកទី៦៨ នៃទិវា បុណ្យឯករាជ្យជាតិម៉ាឡេស៊ី។
អត្ថបទ៖ ពុទ្ធិកា
