ថ្ងៃទី២៥ ខែកញ្ញា ឆ្នាំ២០២៥ នេះ ជាពិធីគម្រប់ខួប៥៦ឆ្នាំនៃការយាងចូលព្រះទិវង្គតរបស់សម្តេចព្រះមហាសុមេធាធិបតី ជួន ណាត ជោតញ្ញាណោ សម្ដេចព្រះសង្ឃរាជថ្នាក់ទី១ គណៈមហានិកាយនៃព្រះរាជាណាចក្រកម្ពុជា ដែលជាកំពូលអ្នកប្រាជ្ញរបស់កម្ពុជា។
សម្តេចព្រះសង្ឃរាជ បានសោយទិវង្គតកាលពីថ្ងៃទី២៥ ខែកញ្ញា ឆ្នាំ១៩៦៩ វេលាម៉ោង២១កន្លះ ក្នុងព្រះជន្មាយុ៨៦ព្រះវស្សា នាព្រះរាជដំណាក់ អារាមដ្ឋានឧណ្ណាលោម រាជធានីចតុម្មុខមង្គល។ កិច្ចពិធីគម្រប់ខួបនៃការយាងសោយព្រះទិវង្គតរបស់សម្តេចព្រះសង្ឃរាជជោតញ្ញាណោ ជួន ណាត នាថ្ងៃព្រហស្បត្តិ ៣កេីត ខែអស្សុជ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៥ ខែ កញ្ញា ឆ្នាំ២០២៥។
សម្តេចព្រះសង្ឃរាជគឺជាអ្នកប្រាជ្ញដែលមានគុណបំណាច់ដ៏ធំធេងចំពោះមាតុភូមិកម្ពុជាយេីងទាំងផ្លូវពុទ្ធចក្រ និងអាណាចក្រ ជាពិសេសនោះគឺលោកជាអ្នកប្រាជ្ញដែលបានបណ្តុះបណ្តាលនូវស្មារតី និងធនធានផ្នែកបញ្ញាដល់គ្រហស្ថ បព្វជិតគ្រប់ឋានានុក្រម។
ព្រះអង្គបានចូលរួមចំណែកជាមួយអ្នកប្រាជ្ញដទៃទៀតដេីម្បីធ្វេីការបកប្រែនូវគម្ពីរក្បួនខ្នាតផ្សេងៗ មានព្រះត្រៃបិដក និងផ្តេីមគំនិតរៀបរៀងនូវវចនានុក្រមជាដេីម។ ជាពិសេសនោះព្រះអង្គបានធ្វេីឱ្យជនបរទេសស្ងេីចសរសេីរនូវបញ្ញាចេះចាំរបស់ទ្រង់ជាខ្លាំងថែមទៀតផង។ ប្រការនេះហេីយដែលធ្វេីឱ្យកម្ពុជាយេីងក៏មានកេរ្តិ៍ឈ្មោះល្បីរន្ទឺលេីឆាកអន្តរជាតិទៅតាមកិត្តិនាមរបស់ទ្រង់ផងដែរ។
ក្នុងការលះបង់នូវពេលវេលាសឹងពេញមួយជីវិតរបស់ទ្រង់នោះគឺដេីម្បីតែការគាំពារនូវមរតកដូនតា ព្រមទាំងអក្សរសាស្ត្រ អក្សរសិល្ប៍ជាតិឱ្យស្ថិតស្ថេរគង់នៅដេីម្បីជាប្រយោជន៍អង្វែងដល់ជនានុជន។ ដូច្នេះហេីយយេីងជាសិស្សគណ និងជាកុលបុត្រកុលធីតាខ្មែរ គួរមានស្មារតីចងចាំនូវគុណូបការ:ដ៏ធំធេងមហិមារបស់ទ្រង់៕
