ឯកឧត្តម សួស យ៉ារ៉ា តំណាងរាស្ត្រមណ្ឌលខេត្តកំពង់ធំ និងជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន (គណៈកម្មការទី៥) នៃរដ្ឋសភា និងលោកជំទាវ នៅរសៀលថ្ងៃទី១៤ ខែធ្នូ ឆ្នាំ២០២៥ បានចុះជួបសំណេះសំណាលសាកសួរសុខទុក្ខ ព្រមទាំងចែកជូននូវសម្ភារៈប្រើប្រាស់ និងគ្រឿងឧបភោគបរិភោគប្រចាំថ្ងៃ ជូនដល់ពលរដ្ឋភៀសសឹកដោយសារការឈ្លានពានរបស់យោធាថៃ មកកាន់ភូមិសាស្រ្តចំនួន ៣ទីតាំងខុសៗគ្នា ដែលមកស្នាក់នៅបណ្ដោះអាសន្ន ក្នុងមូលដ្ឋានស្រុកកំពង់ស្វាយ ខេត្តកំពង់ធំ ចំនួន ៣១៦គ្រួសារ។
ក្នុងឱកាសនោះ ឯកឧត្តមបាននាំយកប្រសាសន៍ផ្ដាំផ្ញើសួរសុខទុក្ខប្រកបដោយក្តីនឹករលឹក និងយកចិត្តទុកដាក់ ពីសំណាក់ សម្តេចតេជោ ហ៊ុន សែន ប្រធានព្រឹទ្ធសភា សម្តេចរដ្ឋសភាធិការធិបតី ឃួន សុដារី ប្រធានរដ្ឋសភា សម្តេចបវរធិបតី ហ៊ុន ម៉ាណែត នាយករដ្ឋមន្រ្តី ព្រមទាំងថា្នក់ដឹកនាំគណបក្សប្រជាជនកម្ពុជាទាំងអស់ ដែលលោកតែងតែគិតគូរពីទុក្ខលំបាករបស់បងប្អូន កូនក្មួយ ប្រជាពលរដ្ឋទាំងអស់គ្នា។
ឯកឧត្តម សួស យ៉ារ៉ា បានដាស់តឿនឱ្យបងប្អូនភៀសសឹកទាំងអស់ សូមយកចិត្តទុកដាក់ខ្ពស់ក្នុងការថែរក្សាសុខភាពផ្ទាល់ខ្លួន បន្ថែមពីលើអ្វីដែលរាជរដ្ឋាភិបាលបានយកចិត្តទុកដាក់ចំពោះបងប្អូនហើយនោះ ហើយថា សូមកុំមានការភិតភ័យ និងព្រួយបារម្ភពេលមកស្នាក់នៅក្នុងមូលដ្ឋានបណ្តោះអាសន្ននេះ និងសូមបន្តជឿជាក់លើ សម្តេចតេជោ ហ៊ុន សែន ប្រធានព្រឹទ្ធសភា សម្តេចធិបតី ហ៊ុន ម៉ាណែត នាយករដ្ឋមន្ត្រី និងជឿជាក់លើវីរៈកងទ័ពដ៏អង់អាចក្លាហានរបស់យើង។
តាមរយៈការបន្តឈ្លានពានរបស់យោធាថៃ បានបណ្តាលឱ្យជនភៀសសឹកក្នុងខេត្តចំនួន៧របស់កម្ពុជា រួមមាន ព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ កោះកុង និងខេត្តសៀមរាប កើនឡើងបន្ថែមទៀតដល់ ១១៧,១២០គ្រួសារ ស្មើនឹង ៣៩៤,៧០៦នាក់ ក្នុងនោះជិត៨០ភាគរយជាស្ត្រី និងកុមារ ។ តួរលេខនេះ គិតត្រឹមម៉ោង១សៀល ថ្ងៃទី១៤ ខែធ្នូ។
ដោយឡែក គិតមកដល់ថ្ងៃទី១៥ ខែធ្នូនេះ ចំនួនជនស៊ីវិលស្លាប់ កើនដល់ ១២នាក់ របួស ៧៤នាក់ និងភៀសសឹកកើនដល់ជាង ៤០ ម៉ឺននាក់ ពីការវាយប្រហារឈ្លានពានរបស់យោធាថៃ។ នេះបើតាមក្រសួងការពារជាតិ។
ការឈ្លានពានរបស់ថៃ មកលើដែនអធិបតេយ្យកម្ពុជា តាមរយៈការវាយប្រហារដោយអាវុធគ្រប់ធុន ទាំងជើងគោក ជើងទឹក និងជើងអាកាស រយៈពេល៨ថ្ងៃកន្លងមកនេះ បានបណ្តាលឱ្យខូចខាតផ្ទះសំបែង និងសម្ភារប្រើប្រាស់របស់ពលរដ្ឋ អគារក្រុមហ៊ុន អគាររដ្ឋបាល សាលារៀន វត្តអារាម ប្រាសាទបុរាណ ផ្លូវថ្នល់ ស្ពាន និងអង្គភាព សាធារណៈជាច្រើនកន្លែង។ ក្រៅពីនោះ សេវារដ្ឋបាល សុខាភិបាល និងអប់រំនៅតាមក្រុង ស្រុក ឃុំ-សង្កាត់ ត្រូវបង្ខំចិត្តផ្អាកស្ទើរទាំងស្រុង៕
