ប្រធានាធិបតីអាមេរិក លោក ដូណាល់ ត្រាំ នឹងធ្វើជាប្រធានកិច្ចប្រជុំកម្រិតខ្ពស់ស្តីពីតំបន់ហ្គាហ្សានៅសេតវិមាននាថ្ងៃពុធទី២៧ខែសីហានេះ ពិភាក្សាអំពីផែនការថ្ងៃទៅមុខសម្រាប់ទឹកដីដែលកំពុងរងគ្រោះព្រោះសង្គ្រាម។ បើតាមទីភ្នាក់ងារសារព័ត៌មាន Reuters ចុះផ្សាយ។
បេសកជនពិសេសរបស់សហរដ្ឋអាមេរិក លោក Steve Witkoff បាននិយាយថា ទាំងអ៊ីស្រាអែល និងក្រុមហាម៉ាស បានបង្ហាញពីការបើកចំហក្នុងការបន្តការពិភាក្សាឆ្ពោះទៅរកដំណោះស្រាយមួយ។
លោក Witkoff បានប្រាប់ Fox News ថា «យើងមានកិច្ចប្រជុំដ៏ធំមួយនៅសេតវិមាន ដែលដឹកនាំដោយលោកប្រធានាធិបតី ហើយវាជាផែនការដ៏ទូលំទូលាយមួយ ដែលយើងកំពុងរួមគ្នាដើម្បីដាក់ចេញនៅថ្ងៃបន្ទាប់»។
តាមរយៈបេសកជនពិសេសរបស់អាមេរិករូបនេះ រដ្ឋាភិបាលអាមេរិក បានបង្ហាញទំនុកចិត្តថា សង្រ្គាមរវាងអ៊ីស្រាអែល និងក្រុមហាម៉ាស នឹងត្រូវបានដោះស្រាយនៅមុនដំណាច់ឆ្នាំនេះ។
សូមបញ្ជាក់ថា សង្រ្គាមដែលបង្កឡើងដោយការវាយប្រហារនៅខែតុលាឆ្នាំ២០២៣ របស់ក្រុមហាម៉ាសលើប្រទេសអ៊ីស្រាអែល បានបណ្តាលឲ្យមានអ្នកស្លាប់ជនជាតិប៉ាឡេស្ទីនជាង ៦២,០០០នាក់ បង្កឱ្យមានគ្រោះអត់ឃ្លាន និងការផ្លាស់ទីលំនៅទូទាំងតំបន់៕
