នាយ ព្រែក បានលុតជង្គង់សុំតារាសម្តែង ឈិន មុន្នីនាថ រៀបការជាផ្លូវការតាមការសន្យា ដោយកំណត់ពេលវេលារៀបការនៅបំណាច់ឆ្នាំ២០២៥ ។
ចំណងស្នេហ៍៦ឆ្នាំរវាងតារាសម្តែង ឈិន មុន្នីនាថ និងនាយ ព្រែក ជិតឈានដល់ថ្ងៃអាពាហ៍ពិពាហ៍ហើយ បន្ទាប់ពីបានគុណគូរកវេលាល្អដើម្បីសាងជីវិតគូរួមគ្នា ជាក់ស្តែងនៅយប់ថ្ងៃទី ២៨ ខែ សីហា កន្លងមកនេះ នាយ ព្រែក បានលុតជង្គង់សុំកញ្ញា ឈិន មុន្នីនាថ រៀបការជាផ្លូវការ ដោយមានមិត្តភក្តិសិល្បៈជាច្រើនរូបធ្វើជាសាក្សី ។
នាយ ព្រែក បានសន្យាថា នឹងមើលថែកញ្ញា ឈិន មុន្នីនាថ មិនឱ្យនាងលំបាកឡើយ ។ ក្រឡេកមកមើលកញ្ញា ឈិន មុន្នីនាថ វិញ ពិតជារំភើបចិត្តខ្លាំងណាស់ រហូតដល់ស្រក់ទឹកភ្នែកដោយមិនដឹងខ្លួន ពីព្រោះពេលវេលានេះគឺនាងទន្ទឹងរង់ចាំជាយូរមកហើយ ហើយនាងក៏មិនធ្លាប់រំពឹងថា នឹងមានថ្ងៃនេះដែរ ។
បើតាមគម្រោងមង្គលការតារាសម្តែង ឈិន មុន្នីនាថ និងនាយ ព្រែក នឹងប្រព្រឹត្តិទៅនៅថ្ងៃ០៧ ខែ ធ្នូ ឆ្នាំ២០២៥ ដោយត្រៀមនឹងអញ្ជើញមិត្តិសិល្បករជាច្រើនចូលរួមអបអរសាទរ ។ កញ្ញា ឈិន មុន្នីនាថ នៅពុំទាន់បង្ហើបប្រាប់ពីថ្លៃបណ្ណាការដែលនាយ ព្រែក នឹងជូនដល់នាងនៅឡើយទេ ដោយនាងទុក Surprise នៅក្នុងថ្ងៃពិសេសមកដល់ ។
សិល្បករិសល្បការិនី និងអ្នកគាំទ្រជាច្រើននៅពេលដែលបានដឹងថា នាយ ព្រែក និងកញ្ញា ឈិន មុន្នីនាថ បានកំណត់ពេលវេលារៀបការរួច ម្នាក់ៗបានជូនពរនាងមានសុភមង្គលគ្រប់ៗគ្នា ៕
