ស្របពេលកម្ពុជា និងថៃ កំពុងមានភាពតានតឹងជាមួយរឿងបញ្ហាព្រំដែន ឯកឧត្តម គួច វែងស្រ៊ុន រដ្ឋលេខាធិការទីស្ដីការគណៈរដ្ឋមន្ដ្រី បានលើកឡើង ៣ចំណុច ដែលក្នុងនាមជាប្រជាជនម្នាក់ អាចធ្វើបានដើម្បីជាតិ ពោលគឺពេលជាតិត្រូវការ ។
ឯកឧត្តម គួច វែងស្រ៊ុន បានចែករំលែកថា ពេលជាតិត្រូវការ គឺត្រូវការទាំងធនធានសមត្ថភាព ភាពជឿជាក់ និងការគាំទ្រគ្រប់កាល:ទេស: ពិសេសពេលជួបការលំបាក ហើយ ក្នុងនាមជាប្រជាជនម្នាក់ អ្វីដែលអាចធ្វើបានដើម្បីជាតិ រួមមាន៖
១/ ចាប់យកឱកាសកសាងខ្លួន ប្រឹងប្រែងរៀនសូត្រ ពង្រីកលទ្ធភាពនៃការពង្រឹងខ្លួនឱ្យរឹងមាំ ប្រកបដោយគុណភាព និងប្រកាន់ខ្ជាប់សីលធម៌ គុណធម៌
២/ ចូលរួមចំណែកក្នុងកិច្ចការសង្គម ចែករំលែកអ្វីដែលមានទៅដល់សង្គមជាតិ មិនថាចំណេះដឹង ការស្ម័គ្រចិត្ត ឬធនធានផ្ទាល់ទៅតាមលទ្ធភាព
៣/ ជឿជាក់លើរាជរដ្ឋាភិបាល និងជឿជាក់លេីខឿនការពារជាតិ ជាពិសេសកងកម្លាំងជួរមុខរបស់យើង ហើយផ្តល់កម្លាំងចិត្តគាំទ្រយ៉ាងសកម្ម ឈរលើស្មារតី ជួរមុខ ជួរក្រោយ គឺតែមួយ។
ជាមួយគ្នានេះ ឯកឧត្តម បានគូសរំលេចថា ជាក់ស្ដែងចំនួនមនុស្សជាង១៥ម៉ឺននាក់ម្សិលមិញ និងទូទាំងប្រទេសបានបង្ហាញការគាំទ្រ គឺបង្កើតបាន “ស្មារតីស្នេហាជាតិ” ដ៏រឹងមាំនៃជាតិសាសន៍ដែលគ្មានប្រទេស ឬសត្រូវណាបំបែកបានឡើយ៕
