សាច់បង្កក ប្រហិតបង្កក ជង្គង់មាន់ ជេីងមាន់ ក្បាលមាន់ ក្បាលទា គ្រឿងក្នុងមាន់ ។ ល ។ ដែលនាំចូលពីថៃរបស់អតីតឧកញ៉ា អ៉ឹម សុផាន់ណារឹទ្ធ នឹងត្រូវចែកចាយនៅលេីទីផ្សារឡើងវិញហើយ បន្ទាប់ពីមន្ត្រី ក.ប.ប អះអាងថា គុណភាពល្អ មិនប៉ះពាល់ដល់សុខភាព ។
យោងតាមកំណត់ហេតុនៅថ្ងៃទី ១៣ ខែតុលា ឆ្នាំ២០២៥ របស់មន្ត្រី ក.ប.ប ក្រសួងពាណិជ្ជកម្ម បានដឹកនាំកម្លាំងចម្រុះ ចុះបេីកឃ្លាំងក្លាសេសាច់បង្កករបស់អតីតឧកញ៉ា អ៉ឹម សុផាន់ណារឹទ្ធ នៅសង្កាត់ច្រាំងចំរេះ១ ខណ្ឌឬស្សីកែវ។ សមត្ថកិច្ចចម្រុះ បានអនុញ្ញាតឱ្យធ្វើការបើកសៀលហ៊ុំព័ទ្ធទំនិញ នៅក្នុងទូបង្កកនេះឡើងវិញ។
ដោយឡែក នៅទីតាំងឃ្លាំងមួយទៀតនៅសង្កាត់គោករកា ខណ្ឌព្រែកព្នៅ មន្ត្រី ក.ប.ប បន្តឃ្លុំសៀល ដដែល ដើម្បីរងចាំលទ្ធផលពីមន្ទីរពិសោធន៍នៃអគ្គនាយកដ្ឋាន ក.ប.ប។
សូមបញ្ជាក់ថា នៅថ្ងៃទី៥ ខែតុលា ឆ្នាំ២០២៥ មន្ត្រីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានចុះពិនិត្យទីតាំងស្តុកសាច់បង្កក ៣កន្លែងដែលជាកម្មសិទ្ធិរបស់អតីតឧកញ៉ា ឈ្មោះ អ៊ឹម សុផាន់ណារិទ្ធ ក្នុងសង្កាត់ច្រាំងចំរេះទី២ ខណ្ឌឬស្សីកែវ រាជធានីភ្នំពេញ។
ក្រោយការពិនិត្យ មន្ត្រី ក.ប.ប បានបញ្ជាក់ថា មន្ត្រីជំនាញមិនបានរកឃើញសារធាតុហាមឃាត់ក្នុងសាច់បង្កកទាំងនោះទេ និងថា សាច់ក្លាសេដែលនាំចូលពីថៃសុទ្ធតែត្រូវបានបង់ពន្ធត្រឹមត្រូវ៕
