នៅព្រឹកថ្ងៃសុក្រ ទី៥ ខែធ្នូ ឆ្នាំ២០២៥ អ្នកឧកញ៉ា ឡេង ប្រុស និងលោកជំទាវ តំណាងអ្នកឧកញ៉ា ឡេង ណាវ៉ាត្រា ប្រធានសហព័ន្ធយុវជនបូជាការពារយុត្តិធម៌ បានអញ្ជើញចុះសួរសុខទុក្ខក្មួយៗកុមារកំព្រា ចំនួន ១៥០នាក់ ក្នុងមណ្ឌលមែកឈើ
ស្ថិតនៅភូមិលិចវត្ត សង្កាត់កំបូល ខណ្ឌកំបូល រាជធានីភ្នំពេញ។
ក្នុងឱកាសនោះដែរ អ្នកឧកញ៉ា និងលោកជំទាវ បានថ្លែងសារចែករំលែកក្តីស្រលាញ់ដល់ក្មួយៗ ដោយផ្តាំផ្ញើនិងលើកទឹកចិត្តដល់ក្មួយៗកុមារកំព្រាទាំងអស់ត្រូវតែមានស្នាមញញឹម ត្រូវខិតខំប្រឹងប្រែងរៀនសូត្រដើម្បីជាទំពាំងស្នងឫស្សីនាថ្ងៃអនាគត។
ក្នុងឱកាសចុះសួរសុខទុក្ខខាងលើ ប្រកបដោយក្តីអាណិតស្រលាញ់ ជាមួយនិងស្នាមញញឹមដែលពោពេញទៅដោយភាពកក់ក្តៅ អ្នកឧកញ៉ា និងក្រុមការងារបានរៀបចំអាហារមួយពេលសម្លការីនំប៉័ង នំបញ្ចុក ជូនដល់ក្មួយៗកុមារកំព្រា និងបុគ្គលិកទាំងអស់ផងដែរ។
ក្នុងស្មារតីផ្តល់ស្នាមញញឹម និងលើកទឹកចិត្តដល់កុមារ និងប្រជាជន ក្រុមការងារសហព័ន្ធយុវជនបូជាការពារយុត្តិធម៌ ដឹកនាំដោយអ្នកឧកញ៉ា ឡេង ណាវ៉ាត្រា កន្លងទៅបានរៀបចំអាហារឲ្យក្មួយៗកុមារកំព្រាប្រមាណ ២០០នាក់ ដែលកំពុងរស់នៅក្នុងមណ្ឌលមែកឈើម្តងរួចមកហើយ៕
