អ៊ីស្រាអែល បានបើកការវាយប្រហារផ្លូវអាកាសយ៉ាងខ្លាំងមួយជុំទៀតក្នុងប្រទេសយេម៉ែនកាលពីថ្ងៃពុធ ដោយបានសម្លាប់មនុស្សរាប់សិបនាក់ ប៉ុន្មានថ្ងៃបន្ទាប់ពីក្រុមឧទ្ទាម Houthi បានធ្វើការវាយប្រហារដោយយន្តហោះគ្មានមនុស្សបើកដែលវាយប្រហារព្រលានយន្តហោះអ៊ីស្រាអែល។ នេះបើតាមការចុះផ្សាយពីទីភ្នាក់ងារ AP ចេញផ្សាយនៅថ្ងៃព្រហស្បតិ៍ ទី១១ ខែកញ្ញា។
ក្រសួងសុខាភិបាលដែលគ្រប់គ្រងដោយក្រុមឧទ្ទាម Houthi បាននិយាយថា ការវាយប្រហាររបស់អ៊ីស្រាអែលបានសម្លាប់មនុស្សយ៉ាងតិច ៣៥ នាក់ និងរបួសជាង ១៣០ នាក់ផ្សេងទៀត។ ក្រុមអ្នករុករកកំពុងបន្តបេសកកម្មនៅតាមគំនរអគារបាក់បែក។ ក្រសួងសុខាភិបាលបាននិយាយថា អ្នកស្លាប់ភាគច្រើនគឺនៅក្នុងក្រុងសាណា ជាទីដែលទីបញ្ជាការយោធា និងស្ថានីយប្រេងមួយត្រូវបានវាយប្រហារ។
ប្រធានគណៈកម្មការអឺរ៉ុប លោកស្រី Ursula von der Leyen បាននិយាយថា លោកស្រីនឹងស្វែងរកការដាក់ទណ្ឌកម្ម និងការផ្អាកពាណិជ្ជកម្មមួយផ្នែកប្រឆាំងនឹងអ៊ីស្រាអែល ជុំវិញសង្គ្រាមនៅតំបន់ហ្គាហ្សាស្ទ្រីប។ ចំណាត់ការនេះបន្ថែមទៅលើភាពឯកោជាសាកលដែលមិនធ្លាប់មានពីមុនមករបស់អ៊ីស្រាអែល ខណៈដែលប្រទេសនេះប្រឈមនឹងការធ្លាក់ចេញពីការវាយ ប្រហាររបស់ខ្លួនដែលផ្តោតលើមេដឹកនាំក្រុមហាម៉ាស់នៅក្នុងប្រទេសកាតា ដែលជាសម្ព័ន្ធមិត្តរបស់សហរដ្ឋអាមេរិកកាលពីថ្ងៃអង្គារ។
ស្ថាប័ន Al-Masirah ដែលជាបណ្តាញព័ត៌មានផ្កាយរណបដែលគ្រប់គ្រងដោយពួក Houthi បាននិយាយថា ការវាយប្រហារមួយលើប្រទេសយេម៉ែនបានវាយប្រហារអគារទីបញ្ជាការយោធានៅកណ្តាលទីក្រុង Sanaa ។ សេចក្តីរាយការណ៍ថា ផ្ទះនៅជិតនោះក៏រងការខូចខាតផងដែរ។
កន្លងមក អ៊ីស្រាអែលបានបើកការវាយប្រហារតាមអាកាសជាការឆ្លើយតបទៅនឹងការបាញ់មីស៊ីល និងយន្តហោះគ្មានមនុស្សបើករបស់ពួក Houthis មកលើអ៊ីស្រាអែល។ ក្រុម Houthis ដែលគាំទ្រដោយអ៊ីរ៉ង់បាននិយាយថា ពួកគេកំពុងគាំទ្រក្រុមហាម៉ាស និងប៉ាឡេស្ទីននៅតំបន់ហ្គាហ្សាស្ទ្រីប ហើយកាលពីថ្ងៃអាទិត្យបានបញ្ជូនយន្តហោះគ្មានមនុស្សបើក ដែលបំពានលើការការពារដែនអាកាសពហុស្រទាប់របស់អ៊ីស្រាអែល ហើយបានវាយប្រហារទៅលើអាកាសយានដ្ឋានភាគខាងត្បូង។
អ៊ីស្រាអែល បានអំពាវនាវជាថ្មីឱ្យប្រជាជនប្រមាណ ១លាននាក់ជម្លៀសចេញពីទីក្រុង Gaza ជាទីដែលខ្លួនបានទម្លាក់គ្រាប់បែកលើអគារខ្ពស់ៗ និងបង្កើនការវាយលុកថ្មីមួយក្នុងគោលបំណងដណ្តើមកាន់កាប់ទីក្រុងប៉ាឡេស្ទីនធំជាងគេ ដែលបានបំផ្លិចបំផ្លាញរួចហើយពីការវាយឆ្មក់មុន និងជួបគ្រោះទុរ្ភិក្ស។
យោធាអ៊ីស្រាអែល បាននិយាយកាលពីថ្ងៃពុធថា ខ្លួននឹងបង្កើនល្បឿននៃការវាយប្រហារតាមគោលដៅនៅជិតទីក្រុង Gaza ខណៈដែលខ្លួនត្រៀមសម្រាប់ដំណាក់កាលបន្ទាប់នៃប្រតិបត្តិការរបស់ខ្លួននៅក្នុងអ្វីដែលខ្លួនហៅថា ទីតាំងរឹងមាំចុងក្រោយរបស់ក្រុមហាម៉ាស។
គួរឲ្យដឹងថា ប្រជាជនប៉ាឡេស្ទីន ត្រូវបានបញ្ជាឱ្យធ្វើដំណើរឆ្ពោះទៅភាគខាងត្បូងទៅកាន់តំបន់សុវត្ថិភាពដែលបានកំណត់ ដែលជាកន្លែងមនុស្សរាប់សែននាក់បានរស់នៅក្នុងជំរុំតង់ដែលបាក់បែក និងជាកន្លែងដែលអ៊ីស្រាអែលវាយប្រហារជាប្រចាំនូវអ្វីដែលខ្លួននិយាយថា ជាគោលដៅសកម្មប្រយុទ្ធ។ មនុស្សជាច្រើនបានបដិសេធមិនចាកចេញពីទីក្រុង Gaza ដោយនិយាយថា ពួកគេលែងមានកម្លាំង ឬលុយដើម្បីផ្លាស់ប្តូរទីតាំងនោះទៀតហើយ៕
