លោក Casey Barnett ប្រធានសភាពាណិជ្ជកម្មអាមេរិកប្រចាំកម្ពុជា បានធ្វើការកត់ត្រានូវទង្វើរបង្កើតសង្រ្គាមវាយប្រហារទាំងកំរោលរបស់ប្រទេសថៃមកលើប្រទេសកម្ពុជា តាមផ្លូវអាកាសប្រហែល ២៣ លើកដោយវាយបំផ្លាញទាំងគោលដៅយោធា និងហេដ្ឋារចនាសម្ព័ន្ធស៊ីវិល រួមទាំងសាលាបឋមសិក្សា វត្តអារាម និងស្ពាន គិតត្រឹមម៉ោង ១២:០០ អធ្រាត្រ ថ្ងៃទី២២ ខែធ្នូ ឆ្នាំ២០២៥។
លោកថា កម្រិតខ្លាំងក្លានៃការវាយប្រហារតាមអាកាសបានកើនឡើង ដោយមាន ៥ លើកនៅថ្ងៃទី១៨ ខែធ្នូ និង ៤ លើកទៀតនៅថ្ងៃទី១៩ ខែធ្នូ។
លើបណ្តាញសង្គមនៅថ្ងៃទី២២ ខែធ្នូនេះ លោក Casey Barnett បានគូសបញ្ជាក់ថា កម្ពុជាគ្មានជម្រើសក្រៅពីទ្រាំទ្រទទួលរងការទម្លាក់គ្រាប់បែក ដែលបានបណ្ដាលឲ្យគ្រួសារ កុមារ និងមនុស្សចាស់កម្ពុជាចំនួន ៥១៨,៦១១ ត្រូវផ្លាស់ទីលំនៅនៅក្នុងប្រទេស ហើយឥឡូវនេះកំពុងរស់នៅក្នុងតង់បណ្តោះអាសន្នតាមជំរំ។ ថៃក៏រាយការណ៍ថា មានមនុស្ស ២១៣,០៧២ នាក់ត្រូវបានផ្លាស់ទីលំនៅដោយការប្រុងប្រយ័ត្ន ព្រោះការបាញ់កាំភ្លើងធំរបស់កម្ពុជា។
លោកបានលើកឡើងថា ជនជាតិខ្មែរនៅទាំងពីរខាងព្រំដែនកំពុងទទួលរងទុក្ខលំបាក។ ទោះបីគេដឹងជាទូទៅថា ប្រជាជនកម្ពុជាប្រហែល ៩៥% ជាជនជាតិខ្មែរ ក៏ខេត្តថៃតាមបណ្ដោយព្រំដែនក៏មានជនជាតិខ្មែររស់នៅច្រើនផងដែរ ដូចជា ខេត្តសូរិន ដែលត្រូវបានប៉ាន់ប្រមាណថា យ៉ាងហោចណាស់ ៦៣% ជាជនជាតិខ្មែរ ទោះបីមានការលាយបញ្ចូលភាសាយ៉ាងទូលំទូលាយក៏ដោយ។
ថៃបានយល់ព្រមលើបទឈប់បាញ់ដោយគ្មានលក្ខខណ្ឌនៅថ្ងៃទី២៨ ខែកក្កដា ឆ្នាំ២០២៥។ ទោះជាយ៉ាងណា ត្រឹមតែពីរសប្តាហ៍បន្ទាប់ នៅថ្ងៃទី១០ ខែវិច្ឆិកា ឆ្នាំ២០២៥ នាយករដ្ឋមន្ត្រីថៃ អនុទិន ចាន់វីរគុល បានប្រកាសថា ថៃកំពុងផ្អាកកិច្ចព្រមព្រៀងសន្តិភាព ហើយថ្ងៃបន្ទាប់ នៅថ្ងៃទី១១ ខែវិច្ឆិកា អនុទិន បានប្រកាសជាផ្លូវការថា កិច្ចព្រមព្រៀងសន្តិភាពបានបញ្ចប់ ហើយ “ឥតសុពលភាព”។ មូលហេតុគឺថា ទាហានថៃ ៤នាក់បានរងរបួសដោយដើរជាន់មីនតំបន់ជម្លោះ ក្នុងពេលល្បាតនៅថ្ងៃទី១០ ខែវិច្ឆិកា។ ទោះបីថៃអះអាងថា មីននោះទើបត្រូវបានដាក់ថ្មីក៏ដោយ ក៏ថៃមិនបានបង្ហាញភស្តុតាងណាមួយថា មីននោះត្រូវបានដាក់បន្ទាប់ពីការចុះហត្ថលេខាលើកិច្ចព្រមព្រៀងសន្តិភាពនៅថ្ងៃទី២៦ ខែតុលា ឡើយ។
លោក Casey Barnett បានបន្ថែមថា ដោយសារការលុបចោលកិច្ចព្រមព្រៀងសន្តិភាពដោយឯកតោភាគីពីភាគីថៃ បានបណ្ដាលឲ្យមានការស្លាប់ជាច្រើនទាំងស៊ីវិល និងយោធា ការបំផ្លាញយ៉ាងទូលំទូលាយ និងមានមនុស្សជិត ៧០០,០០០ នាក់ត្រូវជម្លៀសខ្លួន ការលុបចោលកិច្ចព្រមព្រៀងសន្តិភាពដោយសារទាហាន ៤ នាក់រងរបួស ហាក់ដូចជាការឆ្លើយតបហួសហេតុ និងមិនសមហេតុផល។
ការអំពាវនាវឲ្យធ្វើសង្គ្រាមរបស់អនុទិន អាចត្រូវបានប៉ះពាល់ដោយការគិតគូរផ្នែកនយោបាយ ដើម្បីរក្សាអំណាច។ ការលុបចោលកិច្ចព្រមព្រៀងសន្តិភាពដោយឯកតោភាគី និងការកើនឡើងនៃការប្រយុទ្ធ គឺស្របពេលជាមួយការខិតខំរបស់អនុទិនក្នុងការរក្សាអំណាច ជាការខិតខំមួយដែលហាក់ដូចជាតានតឹងខ្លាំង ព្រោះគណបក្ស Bhunjaithai របស់អនុទិនមានអាសនៈត្រឹមពាក់កណ្ដាលនៃគណបក្សសម្ព័ន្ធមិត្តរបស់ខ្លួន ហើយសម្ព័ន្ធភាពនោះក៏កំពុងដល់ទីបញ្ចប់ដោយជៀសមិនរួច។ អ្វីដែលបន្ថែមសម្ពាធឲ្យអនុទិន គឺអត្រាគាំទ្ររបស់លោកបានធ្លាក់ដល់កម្រិតទាបបំផុត ក្នុងអំឡុងទឹកជំនន់ធ្ងន់ធ្ងរនៅហាតយ៉ៃ ភាគខាងត្បូងថៃ ដែលរដ្ឋាភិបាលរបស់លោកត្រូវបានរិះគន់យ៉ាងទូលំទូលាយថា បានឆ្លើយតបយឺត និងមិនគ្រប់គ្រាន់។
បើតាមរបាយការណ៍របស់សារព័ត៌មាន Reuters បង្ហាញថា ការគាំទ្រពីសាធារណៈចំពោះអនុទិនបានធ្លាក់ពី ៤៨% មកត្រឹម ២៣% ប៉ុណ្ណោះ។ រួមជាមួយកំណើនសេដ្ឋកិច្ចខ្សោយប្រហែល ២% និងការថយចុះនៃចំនួនភ្ញៀវទេសចរចូលមក ៧% ឱកាសរបស់អនុទិនក្នុងការឈ្នះការបោះឆ្នោតឡើងវិញកាន់តែតិចតួច។
លោក Casey Barnett បានបញ្ជាក់ថា ការចាប់ផ្តើមសង្គ្រាមជាមួយកម្ពុជា នៅថ្ងៃទី៧ ខែធ្នូ ឆ្នាំ២០២៥ បានដាក់នាយកដ្ឋមន្រ្តីចាំផ្ទះ អនុទិន ឲ្យស្ថិតក្នុងទីតាំងយុទ្ធសាស្ត្រសម្រាប់ការបោះឆ្នោតឡើងវិញ មុនពេលការរំលាយសភានៅថ្ងៃទី១២ ខែធ្នូ ឆ្នាំ២០២៥៕
