លោក Mark Carney នាយករដ្ឋមន្ត្រីកាណាដា កាលពីថ្ងៃទី៣០ខែកក្កដាឆ្នាំ បានប្រកាសថា កាណាដា កំពុងរៀបចំទទួលស្គាល់ជាផ្លូវការនូវរដ្ឋប៉ាឡេស្ទីននាខែកញ្ញាខាងមុខ ស្របតាមវិធានការការទូតស្រដៀងគ្នា ដែលធ្វើឡើងដោយប្រទេសបារាំង និងចក្រភពអង់គ្លេស។
លោក Carney បាននិយាយថា កាណាដាបានប្តេជ្ញាចិត្តជាយូរមកហើយចំពោះដំណោះស្រាយរដ្ឋពីរ ដែលជារដ្ឋប៉ាឡេស្ទីនឯករាជ្យ ឋិតថេរ និងអធិបតេយ្យភាព ដែលរស់នៅក្បែររដ្ឋអ៊ីស្រាអែល ក្នុងសន្តិភាព និងសន្តិសុខ។
លោកបានបន្ថែមថា កាណាដាមានបំណងទទួលស្គាល់រដ្ឋប៉ាឡេស្ទីននៅឯមហាសន្និបាតអង្គការសហប្រជាជាតិលើកទី៨០។ យើងមានបំណងធ្វើដូច្នេះ ដោយសារតែអាជ្ញាធរប៉ាឡេស្ទីនបានប្តេជ្ញាដឹកនាំកំណែទម្រង់ចាំបាច់ជាច្រើន។
លោក Carney បានថ្លែងយ៉ាងដូច្នេះថា៖ «ប្រធានាធិបតីប៉ាឡេស្ទីន លោក Mahmoud Abbas បានធានាថា រដ្ឋបាលរបស់គាត់នឹងរៀបចំការបោះឆ្នោតដែលពន្យារពេលជាយូរណាស់មកហើយនៅឆ្នាំ២០២៦ ហើយក្រុមសកម្មប្រយុទ្ធហាម៉ាសនឹងមិនមានវត្តមាននោះឡើយ»។
ការសម្រេចរបស់មេដឹកនាំកាណាដា គឺជាជំហានដ៏សំខាន់មួយនៅក្នុងគោលនយោបាយមជ្ឈិមបូព៌ាដ៏យូរអង្វែង និងបន្ថែមសម្ពាធអន្តរជាតិដែលកំពុងកើនឡើងលើអ៊ីស្រាអែល ចំពេលមានសង្រ្គាមដែលកំពុងបន្តនៅតំបន់ហ្គាហ្សា។
ការទទួលស្គាល់របស់កាណាដា នឹងធ្វើតាមប្រទេសជាង ១៤០ផ្សេងទៀតដែលទទួលស្គាល់ប៉ាឡេស្ទីនជារដ្ឋរួចមកហើយ បើទោះបីជាសហរដ្ឋអាមេរិក និងសម្ព័ន្ធមិត្តសំខាន់ៗមួយចំនួនមិនទាន់បានធ្វើតាមក៏ដោយ៕
