មន្រ្តីក្រសួងបរិស្ថាន និងរដ្ឋបាលថ្នាក់ក្រោមជាតិ ជាពិសេសរដ្ឋបាលខេត្ត ទទួលបានការគាំទ្រនូវសម្ភារបច្ចេកទេស ទំនើបដើម្បីគ្រប់គ្រងធនធានធម្មជាតិ ឱ្យមាននិរន្តរភាពសម្រាប់កូនចៅតជំនាន់នៅតាមតំបន់ការពារធម្មជាតិ។
ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នាថ្ងៃ ទី១៣ ខែកក្កដា ឆ្នាំ២០២៥ នេះ បានថ្លែងអំណរគុណ ដល់មន្រ្តីនិងអាជ្ញាធរមូលដ្ឋាន ដែលបានចូលរួមសហការល្អ ក្នុងការអនុវត្តច្បាប់ និងប្រើប្រាស់បច្ចេកវិទ្យាទំនើប ដើម្បីទប់ស្កាត់ និងប្រយុទ្ធប្រឆាំងបទល្មើសនៅតាមតំបន់ការពារធម្មជាតិ។
ក្រសួងបរិស្ថាន ក៏បានដាក់ចេញនូវវិធានការយ៉ាងម៉ឺងម៉ាត់ ក្នុងការទប់ស្កាត់បទល្មើសធនធានធម្មជាតិ រួមមាន៖
១) ការអនុវត្តច្បាប់១០០% ចំពោះអ្នកប្រព្រឹត្តបទល្មើសធនធានធម្មជាតិ
២) ពង្រឹងកិច្ចសហការ ជាមួយគណៈបញ្ជាការ កងឯកភាពរដ្ឋបាលខេត្ត នោះគឺអាជ្ញាធរមូលដ្ឋាន ដែលមានតួនាទី ភារកិច្ចគ្រប់គ្រងធនធានធម្មជាតិ ឱ្យបានស្អិតរមួត ធ្វើការទប់ស្កាត់ការពារ និងអភិរក្សធនធានធម្មជាតិ នៅតាមតំបន់ការពារធម្មជាតិ សហការជាមួយ អង្គភាពប្រឆាំងនឹងអំពើពុករលួយ និងបញ្ជាការដ្ឋានកងរាជអាវុធហត្ថលើផ្ទៃប្រទេស ក្រុមអ្នកច្បាប់ ក្រសួងយុត្តិធម៌ បន្ថែមលើកិច្ចសហការជាមួយអាជ្ញាធរមូលដ្ឋាន
៣) គាំទ្រផ្តល់មធ្យបាយ និងសម្ភារជួយដល់ការអនុវត្តច្បាប់ ដូចជាផ្តល់ដ្រូន ដល់គ្រប់មន្ទីរទាំងអស់ ដើម្បីជួយសម្រួលដល់ ការល្បាតរបស់សមត្ថកិច្ច ផ្តល់ផែនទីតំបន់ការពារធម្មជាតិ និងផែនទីផ្កាយរណប ដល់រដ្ឋបាលថ្នាក់ក្រោមជាតិ បន្ថែមទៀត ដើម្បីពង្រឹងលើការព្រប់គ្រងធនធានធម្មជាតិ
៤) លើកកម្ពស់ជីវភាពសហគមន៍តំបន់ការពារធម្មជាតិ តាមរយៈការអភិវឌ្ឍគោលដៅលំហែបៃតង និងជំរុញការដាំស្តារព្រៃឈើ សំដៅឱ្យមានការដាំដើមឈើឱ្យច្រើន ដើម្បីបង្កើនគម្របបៃតង ចូលរួមទប់ស្កាត់ និងកាត់បន្ថយការប្រែប្រួលអាកាសធាតុ និងឆ្ពោះទៅសម្រេចបានកម្ពុជា ជាប្រទេសអព្យាក្រឹតកាបូន នៅឆ្នាំ២០៥០៕
ឯកឧត្តមរដ្ឋមន្រ្តី បានមានប្រសាសន៍ថាមន្រ្តី បានចុះល្បាតបំពេញភារកិច្ច និងតួនាទីអនុវត្តច្បាប់នៅតាមតំបន់ការពារធម្មជាតិ និងធ្វើការពិនិត្យលើផែនទីផ្កាយរណប ដែលក្រសួងបរិស្ថាន បានផ្តល់ជូន ថែមទាំងធ្វើការបង្ហោះដ្រូន ដើម្បីធ្វើការពិនិត្យលើស្ថានភាពជាក់ស្តែង នៃតំបន់ការពារធម្មជាតិ ដើម្បីពង្រឹងការគ្រប់គ្រងធនធានធម្មជាតិ និងអភិរក្សជីវៈចម្រុះឲ្យមានប្រសិទ្ធភាពផងដែរ។
ដោយឡែក នៅថ្ងៃទី១១ ខែកក្កដា ឆ្នាំ២០២៥ មន្រ្តីឧទ្យានុរក្សប្រចាំស្នាក់ការស្រែវាល និងស្នាក់ការរងភ្នំកូនឆ្កែរ ក្នុងភូមិសាស្រ្តខេត្តព្រះវិហារ បានចុះល្បាតពិនិត្យទីតាំងកាប់រានដីព្រៃ ដែលទទួលបានពីផ្កាយរណប របស់ក្រសួងបរិស្ថាន ត្រង់ចំណុចស្រែវែង រកឃើញបុស្សចាស់ អាយុកាលប្រហែល៥ឆ្នាំ មានទំហំប្រមាណ០១ហិកតា។
ចំណែកឯ នៅចំណុចព្រៃរាំង ក៏បានរកឃើញមានជាស្លាកស្នាមកាប់រានដីចាស់ មានអាយុកាលប្រហែល២ឆ្នាំ មានទំហំប្រមាណ០,៨ហិកតា ស្ថិតនៅក្នុងភូមិសាស្ត្រភូមិភ្ញាក់រលឹក ឃុំធ្មា ស្រុកជ័យសែន ខេត្តព្រះវិហារ៕
ដោយ៖ ផុន លីហ្សា
